News: Local | National | International

Assam majangi Dimapur o Mon na tsüngda jajatettsüla

- C & I. Jamir, Tzüdikong Town.

September 15, 2010 anogo nung Golaghat anasa Murphuloni nung timtem atalokba ajanga hopta ka dak tali timtemteper Nagaland nungi lenirtem tsüngdong tonga oa ajurutepa temenok agütsürang nokdanga aliba lapoktsüba osang angashiogo. Nübor timtema alidang tekaratiba nung jembia inyakba atema kanga pelar. Ajisüaka, iba ya teti atema ta asen Naga nungeri mebilemtsüla, mapang shia mepetmesü tila kar ataloktsü aser ibajagi state ana tsüngda tebilemtsü onük tulu küma aor aser tatemsa asenisa taidok meshia temenok agütsütsüsa akümba ya tongtipangsa Assam majangi asen lima nung asen jajatsü lemang ka meyanglutetba agi yamai timtem ajurür. Tawa atalokba ama Nagaland o Assam nunger na tsüngda mangatettep matalokyonga Naga nunger talisa, Mon, Mokokchung, Tuensang aser Longleng etc district nung alirtem timba Assam ajanga jajar aser timtem zünger mezüngma ajurur.

Karbi Anglong bandh, Sonari Dist. Bandh, Sibsagar dist. Bandh, Jorhat bandh, Golaghat bandh, ASSU bandh, All Assam Tea Workers' bandh, All Assam bandh etc zülur mezüluma bandh alir aser ajurur. Asen lima nungi asen limaisa aodang Assam district 4/5 (pezü-pungo) ajanga jajar aser kenü danga kecha timtem majurui pelaseta oa atongba mangur, bandh kecha maliyonga Police checking, Army (paramilitary) checking etc ano kodang Assam situation tera mejunglir, gari requisition tenüng atemer len tom nung passenger anizüka yutsür gari bener aoba jembir mejembima ajurur. Gari-a All India Tourist permit bener jajara, nenok income kanga lirji ta, ano All Nagaland Taxi permit dang jajara temelaba mali jajarji ta, daily/monthly saru aser senchi nung gari kiburtema sen ajak indokmar. Ashi lemang tajung ka aliasübo, yamai tangar nükrang mati asenoka melila ta nemjema bilemer.

15th Sept. 2010 nü-tobo 12 IR temji kangabo aitsütsü matoker, kasa anogo nung iba ocet zülura Assam, Golaghat  ya ajanga jaja/süi saka declared bandh osang kecha maliasü/mangashi. Saka sepaitem aser tulurtemi teti bilemtettsü kaji na/nenok gari nung red light inoker/prangpong amer jajar saka nür nüburtembo (public) teka tazüng Taxi/Bus/Private gari nung tangar kabo chia jajadarkoti ta bilemtettsüla, kechiyong parnok mit public daksa sünema inyaker.

Anungji, tangar anpo, senpong asüngtsü, makangtsü kangdakja takar akümtsü, mit sünemtsü ayuba alartemji asenok masütsüsa tekaratiba nung Dimapur nungi Mon district tashi jajatsü asen lika nung yangluya-a aliba lenmang ya meyi-tsüngküm amang/sangwa kecha mejembei inyaka renemtsüla ta tangatetba ka lemsateper.

Home  |  Jokes  |  Readers Articles  |  Daily Devotion  |  About Us  |  About Nagaland  | Horoscope | Disclaimer  |  Feedback  |  Contact