News: Local | National | International

Tatem Anogo (Dooms Day)

- N. Imo Longkümer, CTN. -

Meimchir tekolok shisatsü ajanga bushitetba agi anüng ita Petinutem aser alima nung tataloktsü alibatem bushiteta jilia aji metetdaktsür aser aika shitak ataloka aoba angur. Iba ya tejen putu nungi takzüa inyaka aru.

Saka alima tatembang (Dooms Day) indang shin-a arubabo kodanga ataloka maru. Kechiaser iba indang metettsü meimchir nem ain agüja mali aser aji metettsü tim masü ta Tsüngrem O-i ashi. (T. Mapa 1:7). Anungji alima tatem arutsü 1970 küm South India nung nisung ka tenüng agi Paul Asir Laurie ta sür Tsüngremi kanga amshiba nisung kati tatem anogo arutsü anogo aser mapang lateta sangdong agütsü. Iba mapang nübur aika shisa bulutepa tsübua ata. Saka kecha matalok.

Ano tanabuba nung 1988 küm America nunger sayutsüngir ka tenüng agi Edgar Whisenant-i 1988 nung kümzükbapur ayipa atutsü anogo aser mapang asateta sangdong saka kecha matalok. Ibaji pai asadangba ongko tera tai liasü ta pai alima dang sangokja tai nangzü.

Yamajisa mapang mapang shia Dooms Day indang sangdongba ngua arur. Saka tatem anogo indang tebu Tsüngrem dak alaka shinga nema metetdakja mali ta Lai kuli tejangja lir. Item anema tekümdangtsü aika Laishibai sayua lir.

Tang ano tataloktsü ka sangdongbaji, 2012 küm alima nung tatalokba tuluka alitsü indang lir. Iba atema ita anogo, mapang kecha shia mali saka ataloktsübaji "What does the Bible say" ta asüba osang kaket January issue nung angur. Iba nüngtem nung America nungeri English Film ka "Two Thousand Twelve" ta sür sayua alima tesem balala len amshidagi.

Ano alima tzü  mopung melentepba (Climate Change) ajanga tataloktsü aliba kar indang taoba Indian President Dr. APJ Abdul Kalam-i yamai sangdonga lir:

1.   Alima mesamai tang ama oora Climate melenshia atsükba ajanga 2070 tashi nungbo arishi küm 50 nisungtem arishi küm 80 tain ama reprangtsü. Mela-melaa asatsü (ageing).

2.   Tzü ajanga timtemba agi tezüng tashidak (Kidney Failure) agi asüngtsü aser jenti samatsü.

3.   Tzü chiguba melen Towel tzü nung medener temang aidoktsü aser tetsürtem tekolak ku südoktsü, kechiaser alima nung tzü agi aji meshidoktettsü.

4.   Ayong pangshi koba nungi tzü pokteta ayimer item ajak akongtsü. Anungji akhidang tzü marok 8 (eight) jema aliba melen marok ka tesadang dang ngua jemtettsü.

5.   Tzü pokteta aliba tesem ajak nung tanüker ayutsü aser jenjang tasak agi tzü aliteptsü.

6.   Anüng nungi Acid aketba tzünglu arutsü aser ibajagi arem min süngdonglidong ajak raksatsü.

7.   Ali nungi atokba tsünüsempongtsü raksaa rema aotsü aser ali nungi angutsü teimla kecha mali akümtsü.

8.   Mapa inyakba tesem (Industries) ajak anenadoktsü aser unemployment agi asüngtsü.

9.   Oset-tsüset yanglubatem anenadoktsü, alima ya tatsük agi teru-tepunga okrongsettsü.

Tang alima tzü-mopung melenshia kanga tatsük akümba agi tashitemetet linüktemi anir lenmang bushitepa maneni senden lia odagi.

Ano ita petinu takzürtemia sangdongba agi, 2010 küm ya Eclipse (Ita- anü tongdangba) yamai atoktsü:

1.   January 15 nü Solar Eclipse Total (Ring of Fire) alitsü. (Atangji aji shitak atalokogo.)

2.   June 26 nü Lunar Eclipse (Partial).

3.   July 11 nü Solar Eclipse (Total).

4.   December 21 nü Lunar Eclipse (Total).

Item ajak yagi, alimai temelenshiba ka karaa arur ta sayur.

Home  |  Jokes  |  Readers Articles  |  Daily Devotion  |  About Us  |  About Nagaland  | Horoscope | Disclaimer  |  Feedback  |  Contact