News: Local | National | International

Editor

 K. Temjen Jamir

Taneptsü angudak

Tan Nagaland tatar senden nung ken o lemtepba mapang Mon district nungi adokba tatar (MLA) kati Mon district mozü kidangi shiranger ka bener aoba otsü ka ashiba asenoki angashiogo. Aonung ka, iba MLA-ba jagi shiranger ka bener par district nung mozü ki tulutiba nung taneptsü angutsü imlaseta bushia aoba mapang, taoksatsüka aser tesasatsüka, mozü kidangji doctor shianga mali asü. Iba mozü ki ya yipten 50 aliba mozü ki ka lir. Tetezü, iba mozü kidang ken nung shiranger 50 yur anepalutettsü. Aji oda, Mon district ama nungbo private mozü ki maka nungji ajak atema sokari lapokba mozü kiji dang lir. Ibayongji, tang ama tatsük-talem mapangbo, ashiko, mozü kidang monga anepalutsüsa shiranger nisung 50 dak tali arutsüa akok. Iba ama mozü ki ka nung inyaktsü yokba doctor aser nurse-tem tebilemtsü aser teinyaktsükji tanga mozü kidang inyaktsü yokertem dang nungi kanga agia tuluba asütsü. Tatar senden nung Mon district nungi adoksang jagi ashiba agi, Mon district mozü kidangji anepalur doctor maliba dang masü saka meshirangertema tashidak menatsüsa tesempatsüka lir. Iba mozü kidangji light junga marur aser tzü agi meperir. Iba ama tia ka nung shiranger ayiptsü atema yutsüba yipten aser yipten sü nungertemjia komaka asütsü ta ajaki tonga oa reprangdangnüa alitsü südi. Aonungji mozü kidangji doctor ka ta majuru nungji, tanünep mozü kidang jagi odang dang doctor 10 rongnung 4 dang liasü. Yasüngbo doctor shinga mali asü saka tanepbo 10 rongnung 4 bo lir, anungji anogo tasen nung mulungsüngzük terabo angur, ajisüaka doctor 6 ji kong aliar temetetnütsüka. Tanübo Mon district mozü ki indang jembir, saka Nagaland nung district ajak nung sorkar mozü ki reprangdangra temeimtsüka, tesasatsüka aser tejashitsüka, kibur maliba mozü ki amato angutsü. Mon mozü ki amaji sorkar mozü ki teimbaka teshinem agi sünger nashi-ak kitem danga tamajungba aser tesempatsü taketba angur. Item mozü ki ajunga nungji ketdangser aser shiranger anepalutsü asoshi doctor, nurse den mozü yoka lir. Ajisüaka, item teyaritemtemji nübortemi magitetter. Atangji, Nagaland nung sorkar mozü ki ka anabo kanga junga anepaluba angur. Itemji merükmerüker aser doctor aser nurse-tema teti alir aser shirangertem nem mozüa peria agütsür. Sorkar mozü ki merüka ayutsü aser teti doctor aser nurse shitak alitsübaji talisa mozü kidang ketdangser tuluba dak keta lir. Ajisüaka, ketdangser tuluba jagi nübortem memeimra, temulung magütsüra aser ochishia meinyakra, Kohima aser Delhi nungi sen den mozü peria yokyonga majungtsü. Tanü Nagaland nung aliba sorkar mozü kitem shirangbaji sen aser mozü makaba agi masü mesüra mapa inyakertem agi meperiba agia masü saka temulung magütsüba, nübortem memeimba aser ochimashiba ajanga lir. Mozü ki ka mozü ki mesüka merükmerüka ayutsü atema nübo aser sen aika menüngdaker saka alima aser nübortem meima nendaknendaka inyakba temulungjang aser shisatsü nüngdaker. Tanü asen nübortem asoshi iba ama temeim aketba shisatsü aliba ketdangser aser yimsüsürtem nüngdaker. Tangaribo pei sen agi angati mozü ki tulu yanglua nübortem yarir aser alima ajunga nung AIDS tashidak ama agi shirangertem asoshi angati sen aika tenla agüja yaridang, asenokbo sorkar ita sen chia sorkar mozü kidangi arur shirangertema jungjunga meyaritetbaji bilemdangra kanga taaktsüka lir. Aji oda, nübortem ajangzüktsü aser alima ajungtsü atema constituency shia nung adokba MLA-temi mapang-mapang shia pei constituency nung aliba mozü ki, school ki aser sorkar office-tem semdanga anepalura, iba jagia alima tuluka jungadoktsü. Tulur aser takartem atemabo kecha masü, saka sensaker aser makamaitertem  kechiba sorkar mozü ki lir ser nung private mozü kidangi yoktsü ? Sorkar school lir ser nung kechiba private schooli yoktsü ? Senotsü peria endoker ser nung kechiba nübortem lishi nung jajadaktsütsü ? Atangji, Mozü kidang doctor maliba, school nung tesayur maliba aser office nung inyaker maliba atema kanga jashir. Ajisüaka, itemji junga reprangtsüsa tatartem pei constituency nung melira, ano ibajisa tejashitsü aser tesasatsü tuluba asütsü !.

Home  |  Jokes  |  Readers Articles  |  Daily Devotion  |  About Us  |  About Nagaland  | Horoscope | Disclaimer  |  Feedback  |  Contact