*** First and the only RNI Registered Ao-Naga Vernacular Daily in Nagaland ***

Kabul lendong nung India nunger 10 asü

Kabul, Feb 26 (Agencies) : Hokolbarnep Afghanistan lima Kabul yimti nung Taliban telungpurtemi taküm bendanga agüja amakba tashiyim maparen nung tajemba agi India nunger nisung 10 taküm samaogo, ta osang ka ajanga metetdaktsü.

Tekuben tashi amentepa yanglua aliba shishilembaba tesem (shopping complex ) koba nung Safi Landmark Hotel lapoka lir, iba anasaji shi sor ayokba dokan (kebab shop) ka nung atonga-atonga bomb pokloktsüba den ano injang kalokja amakdang nisung 17 asü, ta Afghanistan nunger ketdangsertemi metetdaktsü.

Safi Landmark Hotel nungji India nunger aika anenzüka liasü ta osang angazüker. Asü-ama ajururtem rongnungji sepai ana densema liasü.

Osang ajanga ashiba agi, guesthouse anasaji tamasa nisung kati taküm bendanga agüja bomb pokloktsü aser iba sülenji atonga-atonga bomb tera tilaba kar pokloktsü.

Police-i ashiba agi, nisung kati taküm bendanga agüja pa sasa pokset aser yimmaker tangar ana sepaitemi kaset.

Iba tashiyim maparenji parnoki inyak, ta Taliban telungpur otongdar kati kibur küma metetdaktsüogo.

Helmand province nung aliba Taliban telungpurtem den NATO aser Afghan mitkartemi 'Operation Moshtarak' ta ajaba tongpang teraradak mapang ka nung ano iba tashiyim maparen ya atalokogo.

Shi ayokba dokan anasa mezüngbuba bomb apokba tsüngken ola angashili, kimai asemzüka aluba mapang ka nung ano hotel mezüngbuba taktang nung pai repranga lia nisung kati taküm bendanga agüja bomb ka pokloktsü,  ta tenük kulipur kati ashi.

"Bendangertem aika asatepa jeptepba ni nguogo. Ki taktang telung nung tensaji kanga mejungi liasü. Tsüngrem ni yariangma, aji mesüra kü taküm tang samatsü. Nisung kati taküm bendanga agüja amakba ni nguogo," ta hotel nung inyaker ka tenüng agi Najibullah-i ashi.

Tenük kuli purtemisa ashiba agi, ano bomb tera tilaba tanga ana apok aser iba sülenji prangpong amertem ki telung jagi asemketa atu.

Margarita-i US Tir kinungtsü ajuru

Mexico City, Feb 26 (Agencies) : Mexico Tir kinungtsü(First Lady), Wt. Margarita Zavala-i White House semdanga US Tir kinungtsü, Wt. Michelle Obama den ajurutepogo, ta Mexico sorkari osang ka metetdaktsü.

US Tir office ajanga ashiba agi, tena ajurutepba mapang United States nung aruagi aliba Mexico nunger tanurtem temang kanga yiraba, diabetes aser ozüngi memelaba mozütem achiba (addictions) amala dak sentakba nung sensaksemogo.

Item tebilemtsü dak sentakba nung linük ana tsüngda tesentaktep tajung ayutsü atema kanga temulung agüja jembi, ta kasa osang ajangsa ashi.

Ozüngi memelaba mozü azüoktsü dak sentakba nung senden ka nung adena Zavala ya Brehostibarnü (par mapang) Washington yimti tonga aru aser kasa anogo nungsa kidangi meyipa ogo, ta osang nungsa shisem.

Suu Kyi-i mepishiba Myanmar SC-i magizük

Yangon, Feb 26 (Agencies) : Myanmar lima taküm 2010 küm election agitsü aliba nung shilem magitettsü ta bilema, ita 18 ki adena metugudaktsüi ozüng talenba kübok ayuba anema opposition lenir, Wt. Aung San Suu Kyi-i temepishiba ken o ka agütsü aji oda süaka ibaji tanü Hokolbarnü Myanmar Supreme Court-i magizük, ta la atema okatsürtemi (defence lawyers) metetdaktsüogo.

Taoba mapang la nem agütsüba bangdak ozüng raksaba nung ajemdaker special court kati yaküm Aug 11 nung arishi küm 64 Suu Kyi nem asentenshia kasa temerenshiji agüja lir. May 3 nü temelaba magii tzü wadanga aruba US nunger nisung ka tenüng agi John Yettaw lar kidang anenzükdaktsüba atema la nem iba temerenshiji agütsü.

1991 küm 'Nobel Peace Prize' naroküm ngutetla ya tesüiba küm 20 tsüngda küm 14 tashi lar ki adena metugudaktsüi ozüng tesashi talenba kübok lia arudagi.

La nem agütsüba ozüngji anema Suu Kyi-i tamalen Myanmar Appeal Court nung temepishiba agütsü aji oda süaka parnoki la nem agütsüba temerenshiji tim ta noktakba sülen kasa ken oji Supreme Court dangi aben. Parnokia mezüng kechi temerenshi agüja lir ibaji tim ta obendang agütsü.

La atema okatsürtem rongnungi Nyan Win-i ashiba agi, "Aung San Suu Kyi-i mepishibaji court-i magizük. Ibaji taoksatsübo masü."

National League for Democracy, opposition party lenir, Wt. Suu Kyi nem tawa tesüsa agüja aliba temerenshiji alima ajungalen nungi aitsüogo kechiaser taküm 2010 küm agitsü aliba election nung lai shilem magitettsü.

Myanmar lima ya 1962 küm nungi mitkar yimsüsübai amokbanger arudagi.

Mali nung tekülemdak 15 ajemset

Bamako, Feb 26 (Agencies) : Africa continent kübok Mali anüolentip tsütsü Timbuktu yimti nung aliba Muslim nunger tekülemki tulutiba nung nisung ter pongu ajemset aser tangar aika yiru, ta tanü Hokolbarnü ketdangsertemi osang ka metetdaktsüogo.

"Nüburtemi tekülemkji longa Prophet Mohammed tasoba anogo bilemteta külemba mapang iba lendongji atalok aser idakji nisung aika adenshia liasü," ta Brehostibar aonung tesü atalokba lendong indang tenük kulipur ka tenüng agi Mohamed Bandjougou-i metetdaktsü.

"Asü-ama ajururtemji tajemba agi nisung 15 liasü aser mangtemji tasümang nangdena ayudaki bener ogo," ta telephone ajanga jembidang paisa ashi.

"Kenu tetsür chanu ka densema taküm samaogo. La arishi küm 16 liasü aser la sarasademi aoba liasü," ta ano nisung ka tenüng agi Ali Kounta-i ashi.

Teyaritepertem yakta aruagi yiruyipongertemji anepaluogo, ta ketdangsertemi ashi. Timbuktu yimti nung Djinguereber ta ajaba tekülemki tulutiba nung iba lendong ya atalok.