*** First and the only RNI Registered Ao-Naga Vernacular Daily in Nagaland ***

Taidok memeshidang agüjadoker alir : Rev.Wati Aier

Dimapur, March 07 (TYO) : Tanü Naga nunger rongnung putepa alitsü asoshi taidok agütsüteptsü nüngdakba indang jembidang, pei jenjang kümzüktsü asoshi tangatetertemibo taidok memeshidang agüjadoker alir ta Rev.Dr.Wati Aier-i metetdaktsü.

Tanü Forum for Naga Reconcilaition (FNR) aser Joint Working Group (JWG) purtemi Dimapur Ao Baptist Arogo nung temoatsü sentep bendanga agiba sentong nung jembidang pai iba o ya metetdaktsü. Laishiba nung temadokba chir temulung meyiper tebu dangi taidok nangzüki aruba otsü nung ajemdaker Tsüngrem o jembidang, temadokba chiri tebu dang taidok nangzüktsü renemer aru saka taidok memeshidangyongi tebui pa nem taidok agütsü ta Rev.Wati Aieri Naga nunger sentepa alirtem ayongzüka jembi.

FNR telok ya küm ana tejaklen sarasademba telok ka tenüng agi Shisha Hoho den Tsüngremi jembiba ajanga Naga nunger putepdaktsütsü lenmang bushitsü asoshi tentet. Iba telok nung Rev.Dr.Wati Aier tayonger lir aser Naga nunger lokti mapa nung mongintem aser Tsüngrem tenzükertem kar züngsem lir. Iba telok ajanga tang tashi nung Naga nunger telong nung alir telok balala ayongdena tesem balala nung senden 24 ben tashi liogo aser tangbo telong nung alir telok asem NSCN telok ana den NNC/FGN telok agi akümba'Joint Working Group' (JWG) ka tentetogo. Iba jagi, joko tangbo FNR aser JWG ajanga Naga nunger puteptsü asoshi sentong tapu balala yanglua inyaker.

Tanü DABA tenla kidang, FNR teloki tang tashi nung Naga nunger linük tenzükertem telok balala tsükchitepa aliba anendaktsür putepdaktsütsü atema tenzükba mapatem indang ashidang, tetenzükdangbo Naga nunger telong nung alirtem Nagaland nung tesem ka nung külemi senden alitsübaji tebilemtsü tulu liasü, anungji bendanglen tesem balala nung anir oa senden alitsü tenzük. " Iba mapangbo Naga nunger linük tenzükertem telok balala nung tanishirtemi parnok külemi tayimtsü ka nung amentsü arendak aser takdang ka nung külemi ayiptsü memulungi liasü, saka tangbo parnok külemi jajar, külemi table ka nung chiyonger aser takdang ka nung yiptetter," ta FNR lenir Dr.Watiisa metetdaktsü.

Ano, Naga nunger puteptsü asoshi bendanglen senden aliba kuli ka ashidang, yimjung yangluba maparen nung tangar bendanger mongintem nübo aginüba agi balaka bendanglenang senden alitsübaji nüngdak kümadok ta paisa shisem.

"Tang tashi nung yimjung bushiba mapa nung meimlaba takok ngua lir, item takokji nübortemi maneni sarasademba aser yariba ajanga lir. Ibai Tsüngrem mapa, meimchir mapa asübo laoadoker lila," ta Rev.Dr.Wati-isa metetdaktsü.

Tang Naga nunger puteptsü merangba mapa nung tenteta aliba JWG nung NNC telok ana dena mali, saka parnok ajak den tangatettep lir ta FNR lenirisa metetdaktsü.

Tanü iba temoatsü sentep sentong nung JWG nungi GPRN/NSCN (NSCN-K) tenüng nung kilonser wabong Meren Nokpui jembi, Federal Government of Nagaland (FGN) tenüng nung tadong tir Zopra Vero-i jembi aser NSCN/GPRN (NSCN-IM) tenüng nung kilonser aser Steering Committee nung züngsem wabong Q.Tuccui jembia liasü.

Iba sentong nungsa DABA choir aser Oriental Theological Seminary nungi kaketshirtemi ken tajung aten aser DABA Associate pastor wabong I Wati menden liasü. Iba sentep tatem nung linük tenzükertem ajak apudaka lia telok ajak nokdaker Naga nunger telongjem aser yimjung asoshi taochi meshia sarasadema liasü. 

Naga yimten temeten onük nungi matsüngshitsü : NSCN (IM)

Kohima, March 7 : India sorkari Naga yimten ken o benoka jembitsü atema ano tanaben tenzükba atema pelar saka Naga nunger yimten nüjiso aser alushi longjemtsüba onük nungi terakata matsüngshitsü ta tanü National Socialist Council of Nagalim (NSCN-IM)-i metetdaktsüogo.

"Naga nunger yimten aser ali madak temeten atema nokdakba jenjang nungi terakata masetshitsü. India sorkari taoba mapang nung aibelenba nangzükba aser tarutsü nung ano tebilemtsü onüktem latetyonga aotsü asoshi ajurua ken o lemteptsü nangzükba atema pelar," ta NSCN-IM Steering Committee nung  convenor V.S. Atem-i metetdaktsü.

"India sorkar-i Naga nungertem den ken o tenzüka jembitsü asoshi telatetba tajung agiba atema pelar aser Prime Minister Manmohan Singh-i Naga nunger lenirtem ken o jembitsü jaokba pelashishia agizüker," ta paisa ashi.

Taoba hopta New Delhi nung NSCN-IM tongti zülur Thuingaleng Muivah-i anir par pongo oagi India ato kilonser Manmohan Singh aser kilo kilonser (Home Minister) P. Chidambaram den ajurutepa ken o lemtepa liasü.

NSCN-IM teloki sangdongba osang ka nung ashiba agi, Naga nunger yimten nüjiso angutsü temeten aliba jenjang shitak ayutsü aser kati ka akümtsübua ken o benoka jembitsü.

Naga nunger linük tenzükertem telok balala rongnung tang tashibo NSCN-IM teloki dang India sorkar den Naga yimten ken o benoka jembir.

Parnoki Naga nunger lushi ajak yimten ka kübok longjema alitsü asoshi takangba agüja lir. Naga nunger lushi ya tang Nagaland state den tangtepa Manipur, Assam, Arunachal Pradesh state aser Myanmar kin den lir. Ibayongji, item state-tem jagi Naga nungeri Naga nunger lushi longjemtsü indang jembibaji kenyongi magizüker.

NSCN-IM telok ya India sorkar den 1997 küm August ita nung yimjung yanglu aser alima tesem balala nung parnok ajurutepa Naga yimten tebilemtsü ken o benoka jembir.

NSCN-IM telok o India sorkar na ajurutepa sensaksemba osang angashia, Arunachal Pradesh Home Minister Tako Dabi-i Nagaland tuluba akümtsü atema tang Arunachal Pradesh kübok aliba ali inch kata magütsütsü ta metetdaktsüogo. Onoki ibna atemajibo sashia nokdaktsü ta paisa ashi.

"Onoki center sorkar o NSCN-IM  telok na ajurutepa jembiba ajanga teti atema Naga yimten tebilemtsü ya tatembang küma latetdaktsüner, iba jagi Northeast ajunga tipdema akümtsü," ta tanü Itanagar nung osangbenertem den jembidang Tako Dabi-i metetdaktsü.

"NSCN-IM telok den Arunachal Pradesh dak mekongshii ken o lemteptsüla, onoki kechisüdirsüaka tang Arunachal Pradesh kübok aliba libo shinga nema inch kata magütsütsü," ta Tako Dabi-isa nenshia metetdaktsü.

Nagaland nung tzü mopong indang bushidak ka amenoktsü

Mkg. March 07 (TYO) : Nagaland nung memenui German Organization for Technical Cooperation (GTZ) den külem ser German Development Bank (KfW) teyari agia alima nung tzü mopong melenba indang bushiba reju ka, koba dang Center for Climate Change Studies mesüra C3S ta ajar, iba rejuji lapoktsü sentong yangludagi.

Iba osang ya yashi nikongdang Mokokchung Tourist Lodge nung osangbenertem den jembidang, Additional Chief Secretary, wabong Alemtemshi Jamiri metetdaktsü.

Iba C3S ta ajaba reju ya shisatsü bendendak aser tangazükdak tesem ka asütsü. Iba reju ya akhidang tsüraburtemi metetba den tanü alima tashitemetet inyakyim ajurutepdak tesem ka asütsü ta paisa ashi.

Iba kasa senden nung osangbenertem den jembidang, Nagaland sorkar nung Secretary, Raj Verma-ia  ashiba agi, tang lapoktsü bilema aliba C3S reju nungji talisa alima nung tzü mopong melentepba indang bushitsü. Alima nung tzü mopong atema arrtsü maka, anungji iba reju nung inyaktsüba sentong ya kanga tulu alitsü. Iba reju ajanga estern Himalayan region ajak reprangtsü. Iba reju inyakyim yagi akhidang nungi aluyima arurtem den tanü asüng tongtepratepba lenmangtem ajanga shisatsü lemsatepa inyaktsü tebilemba lir.

Ano, kasa mapang Nagaland sorkar nung tezülur wabong Temjen Toy-i ashiba agi, iba C3S shisatsü bendendak nungi maparen aika atema nüngdak ngutettsüsa inyaktsü aser tang sorkar inyakyim nung 'Mission' aika tenzüka aliba ya yangji külemi adenshir shisalemstepa inyaktsü.

Iba C3S reju ya kodang lapokdir, tang  Mokokchung nung Institute of Information & Communication Technology (ICIT) alidak lapoktsü bilemdagi ta parnokisa ashi.

Yashisa Mokokchung nung sorkar kübok tenteta aliba 'mission' tem Nagaland Bamboo Mission, NEPED, NEPeD, Nagaland Honey & Beekeeping Mission aser Nagaland Bio-resources Mission nungertem shisalemsatepba sentong ka agia liasü.

Tzürangkonglen ashi nung naro aponger

Mkg. March 07 (TYO) : Mokokchung district kübok Asetkong, Tzürangkong aser Japukong len ashi süngküm nung taoba ita ishika tejakdang nungi naro apong tenzükogo (bamboo flowering). Ashi süngküm ya küm 40 nung naro ken aponger aser iba sülen aremer ta angazüker.

Item tesemtem nung ashi süngküm nung naro apongbaji Nagaland Bamboo Mission (NBM)-ia meteta lir aser iba atemaji nüngdak inyak tenzükogo ta NBM lenir wabong Norman Putsure-i metetdaktsü.

Akhi tsüraburtemibo ashi süngküm nung  naro apongba sülenji ayawara arur ta takzüka aru. Iba mapang arem nungji koya kanga apoker aser item jagi alu raksatsür, anungji ayawara arur ta nübortemi jembir. Ano, nübortem atema takoksa kaji ashi nung naro apongba sülen, ashirong ajakji süadoker.

 "Ashi mesüra süngkümji naro apongba sülen süadokba ajanga aluyimertem atema takoksa ajurur, anungji ashiji masüdang iba jagi mijang yanglutsü yimya sayutsü ," ta NBM team leader-isa ashi. NBM-isa süngküm lu ayimertem nem teyari agütsütsü asoshi sentong kar yangludagi ta paisa shisem.

Ashi aser aou süngküm nung naro apongba yabo menokdangtetter aser kodaser naroji aponger, iba kulijia alima nung tang tashi  scientist-temi mebushitetter.

Tanü alima nung tetsürtem anogo amonger

Kohima, March 7: March 8 anogo ya tetsürtem anogo lir. Iba anogo ya alima ajunga nung amonger. Iba anogomong amongtsü lia jelia tanü Nagaland nung Social Welfare & Women Development nung Parliamentary Secretary, Chotisuh Sazo-i tetsürtem nem salem agütsüba osang ka metetdaktsüogo.

Alima ajunga nung amongba tetsürtem anogo 'International Women's Day' anogo nung tetsürtemi rongsenren, yimten aser loktiliba nung takok angubatem asoshi tenüngsanga amonger.

 "Tetsürtem anogo ya kanga tongtibang anogo ka lir. Iba anogomong ajanga alima nung taküm libaliro aser jakla melenshia aotsüba khuret takok ngua bentettsü atema asenok nem tangatetba agütsür. Iba anogomong ajanga asenok sorkar, lokti tentet aser kija longjemer külemi inyaktsü ajungshir aser tetsür o tebur na tsüngda tesendaktep tajungba küma loktilibaren ajak nung inyaka aotsü ayongzüker.

Iba anogomong amongba ajanga tetsürtem taküm libaliro ajak nung tashi itshidaktsütsüsa inyaktsü akanger ," ta Sazo-isa metetdaktsü.

Tetsür o tebur na temang shilem balala yangluba nükjidongjibo alima nung soyapokyatsü atema lir saka loktiliba nung asenoki asenoksasa tetsür o tebur na kasa masü balala kümdaktsüba agi iba teyangluba nükjidongji tamakok aludaktsür ta paisa metetdaktsü. Tetsür o tebur na balala bilemba aser akhi sobaliba ajanga tetsür o tebur na kasasa ama lokti nung züngshitsü tasak kümdakja lir. Tanü item ama bilemba tangatetbatemji agientsüla aser tetsür o tebur na prongla lokti aser yimten nung kasasa maongka agitettsüsa inyaktsüla ta Sazo-isa metetdaktsü.

"International Women's Day' amongba yagi asenoki tang tashi nung takok ngua arubatem atema pelateptsü aser ano tajungba inyaka aotsü asoshi nenshir. Aji oda, iba anogo amongba ajanga tarutsü nung tetsürtem asoshi jenjang tajungba ka yanglutsütettsüsa tetsür shia pei shilem inyaktsüla ta paisa ayongzük.

Asüng Hombar  nü alima ajunga den külem Nagaland nunga tetsürtem anogo amongtsü asoshi tesem balala sentong renema lir. Kohima nung iba anogomong sentong ya anüngdang 11:00 ako nungi  Hotel Japfu, Kohima nung alitsü. Iba sentong nung Nagaland State Commission for Women mendenbula Sano Vamuzo tongti tesemdanger asütsü aser Urban Development nung Secretary, Norman Putsure, IAS-i tongti o jembitsü.

Kasa sentong nungsa Nagaland State Social Welfare Board nung mendenbuba Rhakila Lakhiumong-i tajungshi o jembitsü. Iba sentong nung Women Development department nung Secretary N. Hushili menden asütsü.

Iba kasa anogo nung  Ao lima nunga Watsü Mungdang aser ABAM-Women Department na longjemer tetsürtem anogomong sentong tajung ka Impur nung alitsü renema lir.

Tetezü aketba olemtep yimlar : Pradip Gogoi

Sivasagar (Assam), March 7 : Assam nung yimten aser loktiliba tebilemtsü alibatem ta teti atema telatetba tajung kati arutsü atema sorkar den tetezü keta o lemtep akatsü imlar ta United Liberation Front of Asom (ULFA) nung tatong tir Pradip Gogoi-i metetdaktsü. Pa ya tepuokdak küm ter ana (12) lir, taoba Brishostibar nü to chiok.

"Tepuokdak küm aika yur, ni yang nung jagi achiokba atema pelar. Mapang talangka  meputepteti raratepa aruba angatetepa aotsü asoshi tetezü aketba o lemtep litettsü ta ni imlar" ta Gogoi-i osangbenertem dang ashi.

"Assam nung aliba nübortemi onok Delhi-i oa jembidaktsünürabangla, onoki oa jembitsü. Parnoki onok tanaben prangpong amer rara-ang ta ashi nunga, onoki raratsü molunga lir" ta pai sa ashi.

West Bengal police-i 1998 küm Gogoi Kolkata nung apu. Pa pua arur Guwahati Central Jail nung taoba küm 12 tashi yur, taoba Brihostibarnü pa tepuokdak nungi chiok.

1979 küm pa ULFA nung aten, iba mapang nungi par ki ken danga mesemdangi aliba tan pa tepuokdak nungi alur semdanger. Guwahati nungi kilometer 360 shi orr, pa talidak Sivasagar nung nübortem meyirjang aika Rang Ghar tesem nung senteper pa agizük.

Iba kasa tesem nung 1979 küm April 7 nü, parnok nisung tenet longjemer ULFA tenzük. Tepuokdak yua aliba ULFA lenirtem mechiok tashi, sorkar den o lemtep malitsü, ta Gogoi-i ashi.

"Kodasür onok tanishirtem tepuokdak nungi mechiok o lemtep alitsü? Iba o lemtep nung nisung ajak arua shilem agitsü asoshi, sorkari inyaksangshi kar asütsüla" ta ULFA taong tir-i ashi.

Guwahati jail nung ULFA lenir trok yua lir. Parnok ji ULFA mendenbuba Arabinda Rajkhowa, deputy commander-in-chief Raju Baruah, foreign secretary Sasha Choudhury, finance secretary Chitrabon Hazarika, secretary Pranati Deka aser ULFA yimtenren shisadanger Bhimkanta Buragohain nungertem lir.

Guwahati nung TADA okadak obendangeri Daimary aser Gogoi na tepuokdak nungi 'bail' nung chioktsü mela. Iba inyakyim ya sorkari tepuokdak alir tanishirtem dang taochi sayuba maparen ka mesük aser iba ajanga parnok yimjung olemtep nung tendaktsütsü meranger.

NBCK lanurtemi Kohima orphanage semdang

Kohima, March 7 : Nepali Baptist Church Kohima, Youth Department kübok lanurtemi yashi Kohima nung Orphanage & Destitute Home semdanga, idakji aliba tanurtem aser kibur Mother Zaputuo-u den telungjem sentep ka agiogo.

Iba maparen ya NBCK Youth Department  tenzüker küm 32 buba ajungba tenüng nung inyakba mapa ka liasü

Iba sentong nung Director & Chairman Benjamin-i anir lanur semer (30) shi 'orphanage' semdangi ao. Parnoki sen meyirjang aika alangba jang, aonsotsü, süngojemtsü aser tepu meyuba mozütem bener oa idakji alir nem agütsü.

NBCK Youth Department, 32nd Foundation Day benjungmong, tanü deobarnü 10 ako nungi tenzüka, Midland nung Nepali Baptist Church  nung mongogo.

Iba sentong nung Gorkha Baptist Churches, Nagaland nung Youth Secretary, Robert Aley tongti o jembir liasü.

CTN merükteta among

Changtongya. March 7: Yakanü March 5 nü Changtongya town (CTN) nung aliba private school,  Benison, C.H.S.S, Oriental, aser Sunrise Kindergarten  nung azünger taintemi anir CTN S.D.O (C) office, post office, NST, N.S.C.B item tesem den ano temeket town merüka mapa inyaka mongogo.

Iba telok ya Private school Association ta ser 2006 küm tenzük aser tang parnok kaketshir ajak agi 275 lir.

Yimti merüka ayutsü nükjidong nung iba telok ya tesayurtem ajanga anepalua tenzükba tanü tashi kanga tashi itta odagi.

Iraq nung election agi; 38 pokset

Baghdad, (Kuna), March 07 (Agencies) : Tanü Deobarnü Iraq nung parliamentary elections agiogo aji oda süaka tashiyim lendong balala ataloka nisung 38 shi taküm samaogo.

2003 küm US nungeri Saddam Hussein yimli atsüngdokba sülen tan ya tanabenbuba Iraq lima election agir asütsü.

Tesem kar nung tashiyim lendong atalokaka tanü electionsji takok ngua agitetogo aser taonung 5:00 ako (Iraqi local time) tashi nung linük ajungalen 'polling stations' shibang ta 'electoral commission' ajanga metetdaktsü.

Provinces kar nung tashiyim lendong atalokaka yimti aika nung nüburtem kanga dang lungsoa vote agütsüogo.

Tanü parliament nung tatar menden 325 atema toktepertemji telok balala 86 nungi parnok 6,300 shi liasü.

'Iraqi Independent High Electoral Commission (IHEC)' ajanga ashiba agi tanü Iraq nunger parnok million 18.9-i vote agütsü.

Iraq electoral commission ajanga ashiba agi tanü bomb lendong kar atalokaka linük ajungalen aliba polling stations 50,000 rongnungi mapang tatsüka atema polling stations ana dang ken shibanga liasü.

Linük ajungalen election agiba mapang bomb, mortar aser rocket amshia amakdang Iraq nunger nisung 38 pokset aser 110 shi yiru, ta 'interior ministry' ajanga metetdaktsü.

Ministry ketdangsertemi ashiba agi, Baghdad yimti temeket nung mortar aser rocket agi nisung 30 pokset aser bomb agi nisung 8 pokset.

Ano 'Imam Ali Holy Shrine' ta ajaba tekülem  ki anasa tashiyim lendong ka atalok aser idakjia Iran nunger 37 densema nisung 50 dak tema yiru, ta osang nungsa shisem.