*** First and the only RNI Registered Ao-Naga Vernacular Daily in Nagaland ***

CBI & NU ketdangsertem anema NUTA-i ken o agütsütsü

Kohima, Oct 12 (TYO) : Nagaland University nung mepetmesü indang kuli tejangja bushisüngdangtsü atema koba CBI nem nungloktsü, parnoki bushitetba osangji tiyazü, ta tanü 'Central Executive Committee of Nagaland University Teachers' Association (CEC NUTA)'-i CBI report-ji aitsüogo. Parnokisa CBI anema aser ano University dak sendakba tanga tebilemtsütem asoshia High Court nung ken o (PIL) agütsütsü ta metetdaktsüogo.

Tanü nikongdang Kohima Press Club Conference Hall nung osangbenertem den jembidang CEC NUTA tir, Wt. Rosemary Dzuvichu-i ashiba agi, CBI purtemi parnok nem nungloktsüba mapaji ochishia meinyak aserbo Vice Chancellor, Prof. K. Kannan-i amokbanger amshi.

Laisa ashiba agi, University nung Vice Chancellor aser tangar ketdangser asemi aibelenba dak sendakba nung takhangba agütsürtem, NUTA-i tongtibang tebilemtsütem benokbaji  temulung agüja meinyak aser iba yongji CBI-i tiyazü kuli agütsü.

Nagaland University dak sendakba nung India Tiri (Visitor) tetuyuba agütsür yokba 'Visitorial CBI Invesitgation' ajanga bushitetbaji menüdong ka kümogo.

Senotsü amshiyim nung ajemdaker Vice Chancellor anema NUTA-i agütsüba ken o nung CBI teloki takok nguteta meinyak anungji NUTA-i kanga süoki yia bilemba ajungaji CBI report jagi tamakitsü kümtsüogo, ta laisa ashi.

Laisa ashiba agi, CBI report-ji taküm 2010 küm March ita nung Vice Chancellor Prof. K. Kannan (under investigation) nemang agütsü aser ibajia MHRD-i masü CBI, EOW Kolkata-iang agütsü.

Ketdangser shiba anema tang kuli bushisüngdang südagi, iba mapang tepiyong pa ano kasa menden nungsa mena lir aser ibaji 'rules of inquiry' den kenyongi meputep; shitakba agibo parnok nemji 'inquiry on leave' agütsütsüla; iba ya tebilemtsü tulu lir, ta laisa ashi.

Tetsür temeden atema Kohima nung shisa lemsateper

Kohima, Oct 12 (TYO) : Kohima LCS Conclave Hall nung Mongulbar nungi tenzüka anogo ana atema tetsürtem temeden atema shisa lemsatepba sentong ka kadagi. Iba sentong ya C-Cerp & NEIP den lungjemer North East Network-i ayongzükba lir.

Iba sentong tenzükba senden nung tanü Naga Women Union Manipur tir Grace Shatsang-i okila jembidang, lokti nung temelenshi tajung adokdaktsütsü atema tetsürtem ya telemtetba agiba telok nung anioktsüla ta metetdaktsü.

Tanü asüng alima kanga melenshia aoba aser tazüng tashir jenti adokba mapang ka nung, tetsür o tebur  na tsüngda tepila tuluba adoker ta laisa ashi. Tongtibangsa tanü asüng tetsürtemi ajuruba timtem kaji, sobaliba aser linük temzüng nung aliba ozüngtem ya lir, oda ozüngji  tetsürtem anema sürabang ibaji lokti ajak anema asütsü. Anungji senden nung adenertem ajaki tetsür temeden wazüka ayutsü asoshi inyaktsüla ta Shatsang jagi ayongzük.

Kohima Science College nung tesayur, Dr. Anungla Aier-ia, odang Naga nunger lokti nungbo tetsür o tebur na tsüngda tepila kecha melii saku süa amshir ta jembiakasa tetsüngdaji odangsa lir ta metetdaktsü.

Tanü tashi arudang tetsürtem ya decision making bodies nung manioker,  tetsürtem anema mapa tamajung inyaker nem  temerenshi itemi agütsütsü ta sobalibaren nunga ozüng tejangja lateta maka ta laisa shisem. Sobaliba ozüngtemji tebur-i senmangtepbaren nung amendaka aliba ajanga  tetsürji kangabo mezüngshir.  Anungji tetsür anema tashiyim mapa inyakba aser tetsürtem merenshiba mapa tamajungtem ya sobaliba ozüng agi o bendang magütsütsü ta state nung ozüng ka yanglutet asübo jungla ta laisa metetdaktsü.

Iba sentong nungsa tanü Naga Mothers Association tir, Abeiu Meru-ia shisa lemsatepba mapang, tang Nagatsürtem jakdang aliba tetsükdaktsü tulutibaji sobaliba ozüng ya asütsü, ibai tetsürtem  asoshi mapet aser yamala ozüngji kin  shia sasep nung lir ta metetdaktsü. Oda iba ama tejen sobalibaji ajanga tetsürtem temeden shitak wazüka meyuteter aser iba jagisa asen lima nung tetsürtem ya India aser alima den liromedema aotsü makoker.

Sobaliba ozüngi  tetsür mezüngshiba kaji, ali nung tetsürtem temeden mali,  senmang maka aser tetsü tebou nungi aruba rongsen nung temeden magütsür, iba yagi Nagatsürtem dak kanga sashia kongshir ta laisa metetdaktsü.

Naga nunger loktilibaren ya teburi yimsü asüba nung  amendaka lir, anungji lokti ajak nung tetsür indang temedenji angateta ashitsüla ta laisa tebilemba ka lemsatepa ashi.

Tetsür nem tashi agütsütsü süra, parnoki tashi lemsateptsü menongnangtsüla aser  lokti aser state renloktsü atema tebur den külemi inyakdaktsütsüla ta laisa shisem

Tanü sentong balala nungsa Legal Consultant NCW Lydia Yeptho, Nalini Nayak, SEWA Kerala, Executive Director NEN M. G. Sreekala aser NUTA tir & NMA Advisor Rosemary Dzuvichu nungertemia shilem agi.

Iba sentong ya Bodhbarnü atemtsü.

Samaba gari Kohima police-i bushitet

Dimapur, Oct. 12 (TYO) : Taoba deobarnü Kohima sentep kima nungi bolero gari ka samaogo ta osang aruba sülen policetemi idangjisa tsüka ronga tesem balala ajaklen osang yoker mita bushiba ajanga iba gariji ngutetogo ta Kohima Superintendent of Police Office ajanga osang ka metetdaktsü.

Iba osang nung ashiba agi, iba gari ya Dr. C. Jamir-er indang No. NL-01C-8645 liasü. 'Onok sentep kidang mena alidang ozü gari sama' ta lai idangjisa osang agütsü. Anungji  policetemi check gate ajak dangi osang yok aser  tesem balala ajaklen mita ata.

Khuzama PS nungi police telok kati Kedima lenmang nung mitba mapang iba gari denji külemi auertemji apu. Gari bener aortemji -  1) Zakhama yimer Mr. Kevizeho Zhotso (34 yrs), pa ya tang 'L' Khel, Kohima nung lia liasü. 2) Assam Hojai yimer Mr. Ranjit Singh (33 yrs), tang Purana Bazar, Dimapur nung alir aser 3)  'T' Khel, Kohima yimer Mr. Putsolie Sekhose (29 yrs),  tang New Reserve, Kohima nung alir liasü.

Iba telok ya gari auyar takotet telok ka liasü, taoba mapang nunga parnoki ozüng anema inyakba record lir ta kasa osang ajangasa metetdaktsü.

Nüburtem dak kodangsa yamala mesükba lendong atalokdir, yakta osang tejangja ajak policetem dang shiang ta sangdongogo. Nüburtemi yamala osangji item phone number nung ashitsüla:

OC North PS - 9436010683 /  2222222        OC South PS - 9436403378 /  2222111

OC Khuzama PS – 9612148989                  OC North Traffic - 9436011788

OC South Traffic - 9856677667

BSF nung inyaktsü ajar

Dimapur, Oct. 12 (TYO) : Tang linük nung Border Security Force (BSF) nung inyaktsü atema constable (GD) teburtem 19,857 shimtsü atema osang sangdonga lira ser item rongnung jagi Nagaland nung alirtem asoshi mapa 144 lemzükja lir.

Nagaland nungi shirnokisa iba mapa inyaktsü jangrar, parnok asoshi application form Kohima , Dimapur, Phek aser Zunheboto post office nungi October 4 nungi 23,2010 tashi nung angutsü aser application-ji November 3, 2010 tashi nung meyipa agizüktsü ta BSF sangdong ka ajanga metetdaktsüogo.

Iba mapa nung aitsü jangrartemji 01.08.2010 anogo tashi nung tasoba küm 18 nungi 23 tashi asütsüla saka SC/ST purtem atemabo tasoba küm 28 tashibo agitsü aser tazüngba jenjangji class 10 ajangba nisung asütsüla. Ano, parnok temang tasazükji tar 170 cms aser teku tasazük 80cms & 85cms asütsüla.

Nagaland nungi BSF nung inyaktsüsa tejangrar aser temsüa alirtem aika liaka, osangtsüsang agi matongba ajanga sepai shimba mapang memeteti süidaktsür, anungji tangbo iba osang ya ajaki angashitsüsa sangdongdi ta111 Battalion BSF nung Commandant wabong KH Nitovi Sema ajanga metetdaktsü.

Guwahati nung UNLF züngsem 2 apu

Guwahati, Oct 12 : Manipur nung aliba United National Liberation Front (UNLF) nung züngsem ana tanü Guwahati nung apu. Telungpur ana ya  ki ka nung taa agüja liyonga aru, ta ketdangsertemi ashi.

Guwahati nung Panbazar tesem kübok UNLF telungpur ana, Jai Singh aser Ashok Singh na apu, ta police otongdar kati metetdaktsü.

"Itdangiter kari osnag sangoktsüba ajanga onoki iba ki oa longpang aser telungpur anaji apu" ta police tulur kati ashi. Tena ket nungi cell phone, laptop aser tashiyim agi sen meshiba tezülubatem ngutet.

"Guwahati nung telidak saka Manipur nung shishilemba asür nisung ka dang nungi sen meshitsü atema tena yangi aruba liasü" ta police tulur jagisa ashi.

Tena dang asüngdangya asüba sülen police temi ano Guwahati nung UNLF telungpur kar aputsü bushitepdagi.

"Guwahati ya Manipur nung aliba telungpurtemi asoshi tongti tesem ka kümogo. Parnoki Guwahati nung arua kaketshir mesüra mapa inyaker nisung ama sayua alir aser miima parnoki tashiyim agi sen meshiba maparen inyaker" ta police tulur-isa metetdaktsü.

Taoba ita 6 tsüngda, Guwahati nung Manipur nunger telungpur nisung 20 jungnüa police-i puogo.

GMS Mokokchung Town küm 50 jungogo

Mkg. Oct 12 : Government Middle School Mokokchung Town tenzüker küm 50 ajungba jubileemung sentong  tanü GMSTM kilem nung kanga meraketa agiogo. Iba sentong nung Mokokchung, Deputy Commissioner, Wt. Lithrongla G. Chishi tongti tesemdanger liasü.

Lai iba sentong nung tongti tesemdanger o jembidang, Nagaland Statehood mangudang yongi yangi school ka lapokteta tanü tashi bener arutetba asoshi taoba lennirtem aser tang inyakertem nem Wt. Lithronglai tenüngsang agütsü.

School ka ajungtsüba aser tanur ka chichiba senso tajung ka kümdaktsütsü asoshi tesayurtem kisüng khuret masü, saka tsüraburtem aser yimtenia sakuku shilem agitsüla ta  Lithronglaisa ayongzüka ashi.

Kechi mapa südir süaka mezüng yongi nüngdakba ajak lirbo metenzüker, tanübo akhi amato masü sorkari school ka nung nüngdakba kechisarena teperi agüja tanurtem shisaliokdaktsür, anungji, iba maongkaji tagi shia agitsü asoshi laisa ayongzük.

Tetushi tesemdanger Mokokchung, DEO, Wb. Y. Lanutemjeni GMSMT pur küm 50 ajungba temaitsü adokba Jubilee nüngo kaket ka sayatsü.

Iba kasa sentong nung temenungratsüka taoba mapang iba school nung zünger aor (alumni) 23 Impur Assembly Constituency nung adoksang MLA, Wb. Nungsangyapangia shilem agia o tatsüka jembi, aser taoba Head Master, Wb. N. Talitemjen Jamir o DIS, Mokokchung, Wb. A. Mangyang tenati tajungshi o tulu den tepela o bener aru. 

Tanü iba school nung ya Mokokchung nung alirtem dang masü talisa kidanger district-tem  shirnok koda masü teküpok jenjang nung alir, pi kin dena shisaluyimba tsütsü tajangzük tulu ngudagi.

Sentong nung GMSMT nung azünger tanurtemi shilem tapu balala agiba ajanga sentong tali meraketdaktsüba den tesentepertem peladaktsü.

Mechanical Field staff-tem senden alitsüa

Dimapur, Oct. 12 (TYO) :  All Nagaland (PWD) Mechanical Field Staff Association pur Central Executive rongdak senden ka October 19, 2010 anepdang 10:00 ako nungi tenzüka Dimapur nung kimen kidang alitsü ta sangdong ka ajanga metetdaktsüogo.

Iba senden nung telok tebilemtsütem aser taruba lokti senden atema ken o lemteptsü alinungji, district aser unit  nung tongti ketdangpurtem ajak arua dendaktsüner ta kasa sangdong ajangasa metetdaktsüogo.

GOC 3 Corps-i Viswema nunger nem sempet agütsü

Wiswema, Oct 12 (TYO) : Ita ana tejaklen Kohima anasa Viswema nunger lushi Teyezhu tenem nung sepaitem indang helicopter ka tsükokba mapang par yimertemi kanga junga naepalua yaritepba asoshi tepela sayuba temaitsü tanü General Officiating Commandant (GOC) 3 Corps Lieutenant General N. K. Singh, AVSM, VSM-i sempet ka (silver trophy) agütsüogo.

Tanep Viswema Community Hall nung par yimer putu yimsüsürtem, GBs, Youth aser Women leader-tem den jembidang,  helicopter tsükoka army jawantem taküm samar alidang yimertemi yakta oa yaritepba asoshi pelar ta GOC-i tenüngsang agüja metetdaktsü.

Armytemi nüburtem nem water supply agütsür, community hall sütsür, computer centre lapoktsür aser ano tanga terenlok mapa balala inyaktsür. Item ya nüburtemi tim lenmang nung amshitsüla ta paisa olen ka densema metetdaktsü.

Tanü GOC jagi, GOC 56 Infantry Division Major General R. N. Singh, SM, VSM tsüngdang Viswema Village Council Chairman, R. Ketsore Mekro nem iba sempet (trophy)-ji agütsü.

Taküm August 18 nü Viswema nunger lushi Teyozhu tenem nung army helicopter 'Cheetah' tsükokba mapang pilots ana aser army officer ka ta tsükseta asü. Tasürtemji -  Colonel P K Pal, Sena Medal aser pilots Major Nikhil Prakash o Major Rakesh Sharma na liasü.  

Spl. Handloom Expo nung shilem aginertem ajar

Dimapur, Dec. 21 (TYO) : Taruba ita November 3 - 16 tashi  Nagaland Handloom & Handicrafts Development Corporation Ltd. (NHHDC) Dimapur ajanga Zunheboto town nung Special Handloom Expo sentong ka ayongzüka lir.

Iba sentong nung shilem aginer Societies/SHG aser nijatemi Project Cell, NHHDC Ltd, Half Nagarjan Dimapur mesüra General Manager, DIC Zunheboto nem tan October 28 tashi nung application agüjang ta tanü NHHDC Ltd Managing Director, Hokiye Yeputhomi-i osang metetdaktsü.

Zunheboto District atener oa alirtem nem taru tao Bus bara NHHDC-i agütsütsü aser ano  shilem agir stall shia nem anogoshia D.A @ Rs.200/- agütsütsü ta kasa sangdong ajangasa metetdaktsü.

ASBAT-i pelaba metetdaktsür

Dimapur, Oct. 12 (TYO) : Wb. A. Pangjung Jamir-i Land Resources Department nung Deputy Director menden ngutetba asoshi tenüngsang agütsür aser department dang kanga pelar ta tanü Asangma Senso Bendang Alir Telongjem-i (ASBAT) sangdong ka ajanga metetdaktsü.

Ano tarutsü nung, nübur tenzüktsü asoshi lenir taküm arishi temjena moajang ta telok tenüng nung  tezülur, Wb. Chiten Imsongi metetdaktsü.

Mkg DC-i metetdaktsür

Dimapur, Oct 11 (TYO) : Tang 'Durga Puja' benjong tenüng nung,  9th Assam Rifles C/O 99 APO Mokokchung purtem akhi ama tan October 8 - 17 tashi anepdang aser aonung injang kashishiba sentong alitsü, anungji nüburtemi timtem arema District Administration den teka aotsü mepishir ta tanü Mokokchung Deputy Commissioner Office ajanga  town nung alir ajak dang metetdaktsüogo.

Ken album tasen "Tesüngmangtsü Taochi Ola" sayaogo

Dimapur, Oct. 12 : Tang Naga Christian Fellowship Bangalore (NCFB) pur 'All Night Prayer' sentong aliba mapang, NCFB Pastor, Zhabu Yimsung-i October 8, 2010 nü music album  tasen ka tenüng agi "Tesüngmangtsü Taochi Ola" sayatsüogo.

1970's aser 80's mapang  nüburtemi kanga sabua tenshiba kentem bendener iba album ya adoka lir. Iba den külemi, yangisa Ao ken kaket nung temalen liasüba ken koba tanü asüng  meinoksemi lir item kenjia  kar enoka lir.

Item kenji tejen saka tanü asüng amshiba kongki ola tapet enoka yangluogo, ibai lanurtem nem item kenji tasen küma angadaktsütsü nükjidong nung yanglu ta album adokertemi metetdaktsü.  Item ken ajanga nüburtemi Tsungrem Taochi Ola angashitsü  yimlar ta parnokisa ashi.

Iba album ya item tesem nung angutsu - Kohima : Schema, Near Oking Hospital, Fashionable, PWD Junction.  Mokokchung: Serenat  I.M Road, Dimapur : La Premiere, Nuton Bosti & Fashionable, Half Nagarjan.