*** First and the only RNI Registered Ao-Naga Vernacular Daily in Nagaland ***

Kinüngtsü o jala na tepseter, Bihar MLA soseta asü

Patna, Feb. 26 (Agencies) : Bihar minister Narendra Singh-er kidang, par jabaso JD(U) MLA Abhay Singh-i pa kinüngtsü aser ita trok jala kaseter pa sasa soseta asü.

Iba lendong atalokba sülen Abhay Singh tebu Narendra Singh süjia ao aser Patna Medical College and Hospital nung anepaludar. Narendra Singh ya Bihar sorkar nung Food and supplies minister inyaker aser pa temolungjang timtim asoshi ICCU nung yur anepaludar.

Tanep 2:00 ako meta Abhay  o pa kinüngtsü asatep, iba sülen pai par jala aser kinüngtsü prangpong agi kaset aser tatem nung pa sasa kaseta asü, ta police-i ashi.

Par jala tantsüla iba mapang tetsü den takdang balaka nung liasü.

India-i Pakistan nem tezüluba asem agütsüogo

New Delhi, Feb. 26 (Agencies)  : 26/11 nü kiralongrartemi Mumbai amakba ken o nung Pakistan nung tang teinyakdak Army tulur ka aija, India-i Pakistan nem tezüluba ka agütsüogo. Iba tulur yagi  Major Iqbal ta tiyazü tenüng ka amshia lir.

India o Pakistan nungi Foreign Secretaries tem senden ka agidang, India-i tezüluba kaket asem Pakistan nem agütsü. Iba senden ya New Delhi nung ghonda ka shi agi.

Mezüngbuba tezüluba nung, 26/11 Mumbai lendong nung aija aliba kija aser teloktem nem Pakistan-i temerenshi agüjang ta zülua lir. Item nisungtem nung Major Iqbal aser Jamaat-ud-Dawa (JuD) lenir Hafiz Saeed dena lir. Pakistan-i item nisung pua arur temerenshi agütsür India nem agüjang ta zülua lir.

Tanabuba tezüluba nung, 26/11 lendong tasa atonger David Headley nem shisatsü aser teyari agütsüsang Ilyas Kashmiri aija zülua lir. 2006 nungi 2009 tsüngda Headley India-i aiben aruogo. Iba mapang pai Mumbai nung kiralongrartem amakba tesem pezü pai ladanga senzüogo. September ita Chicago yimti nung pa den Tahawwur Rana apu. Denaprong-i Mumbai amakba nung shilem agiogo, ta aija lir.

Tasembuba tezüluba nung, Indian Mujahideen aser Khalistani yarirtem nem Pakistan-i tejenokdak agütsür ta shia lir. Tan ita tejaklen Pune nung bomb apokba ya Indian Mujahideen aser Lashkar-e-Toiba nati külemi inyak, ta India-i tamang makai bilemer.

Sorkari Women's Reservation Bill lenmang lapoka yutsü

New Delhi, Feb 26 (Agencies) : Lok Sabha aser state assemblies nung noklang nung shilem semer asem (33%) tetsürtem asoshi meka-a yutsütsü Women's Reservation Bill ken o atema sorkari lenmang lapoka yutsüogo.

Iba Bill ya 2008 küm Rajya Sabha nung tamasa benoka Parliamentary Standing Committee nem jungjunga shisadangtsü agütsü. 2009 December ita iba committee ajanga osang agütsüba nung Women's Reservation Bill ji tang aliba ama agizüka yuang ta ashi, ibayongji tanü sorkari tanü iba bill agizüka yuogo.

Northeast nem sen crore 1,760 tutsü

New Delhi, Feb. 26 (Agencies)  : Northeast region nung terenlok mapa inyaktsü asoshi sen teindoktsü aliba, taoba budget dang nungi noklang nung ter teko (19%) shilem tali tutsüogo.

2010-11 budget nung Northeast region atema sen crore meyirjang ka, noklang tenet ser roker (1,760) alitsü.

“2009-10 budget nung sen crore .1,475.21 liasü aser taküm sen crore.1,759.33 tutsüogo” ta Finance Minister Pranab Mukherjee-i tanü Lok Sabha nung metetdaktsü.

Iba Budget nung, State ti (8) nung 'integrated socio-economic development' maparen asoshi sen crore noklang trok ser metsür asem (623) enoka lir.Border Roads Organisation (BRO)-i achaayanga lenmang yanglutsü asoshi sen crore pungo (5) enoka lir.

'Infrastructure projects and schemes' asoshi loan agüja inyaktsü sen crore noklang ti (800) enoka lir.

Gari ajak nung jenjang atutsü

Mumbai, Feb 26 (Agencies) : India nung gari yanglur tulutiba company, Maruti Suzuki-i parnoki balala ajak nung jenjang, sen meyirjang asem (3,000) nungi meyirjang ter asem (13) tashi atutsü, ta metetdaktsü.

Hyundai Motors garitem nunga, sen meyirjang trok ser noklang pungo (6,500) nungi meyirjang metsür pungo (25,000) tsüngda atutsü.

Honda Siel Car indang garitem nung, meyirjang ter asem (13,000) nungi  meyirjang lir ka (41,000) atutsü ta metedaktsü.

"Central excise duty nung taa tali ajungketba ajanga, gari nung jenjang atutsübaji kanga nüngdak" ta MSI Chairman R C Bhargava-i ashi.

Gari yanglua ayokba nung 'excise duty' noklang nung shilem ana (2%) Budget nung atuba agi, gari ajak nung jenjang atutsü.

General Motors aser Mahindra & Mahindra (M&M) company temia parnok gari nung jenjang atutsü ta metetdaktsüogo.

600 ben dak tali auya senzür 'Super thief' ka puogo

New Delhi, Feb 26 (Agencies) : Taoba küm ka tsüngda nung noklang trok (600) ben dak tali auyaba, asangur ka puogo. Pa dang 'Super Thief' ta-a ajar. Arishi küm semer ana (32) asangusang yagi iba mapang nung sen lakh ter pungo (15) nungi metsü (20) tsüngda auyar alitsü, ta police-i ashi.

Delhi anüolentip Press Enclave anasa police-i Subhash pua aru. Pa ket nung taribi agi yangluba senti oset sen lakh pungo jenjang aser motorbike ka dena apu, ta Deputy Commissioner of Police (South) H G S Dhaliwal-i metetdaktsü.

December 26 nungi 31 tetsüngda nung Home Ministry nung Assistant Audit Officer

R K Sharma aser par kibong aini or külen, memetetba nisung kari par ki kakpoka auya. Iba auyaba atema pai police nem ken o agütsüba sülen, police temi bushitepa arur iba asangusang ya apur..

Policetemi lenmang nokdanga yur Subhash dang anenang ta ashidang, pai motorcycle nung jena aotsü merang. Saka Sub Inspector Dalip Kumar o Sanjay nati arshiyonga or Subhash bike tesülen tsüker laodaktsü. Iba sülen parnoki Subhash pua aru.

Policetemi asüngdangya asüdang, pai ki o jen kakpoka tur auyaba noklang trok (600) ben shi inyak, ta nangzükogo.

"Subhash dang ya 'Super Chor' ta ajar. Pa ya kanga junga renemteter jangratema dang alir. Pa indang medemtsürtem aika lir. Pai jenjang aika alang yi 'Blue Label Scotch Whisky' dang ajemer aser motorcycle tajung dang anishir " ta police-i sa shisem.